Baile Foclóir Nua Béarla–Gaeilge » FNBG »
Cuardaigh focal Gaeilge nó Béarla.

Maidir leis an suíomh seo

Fáilte go dtí an Leabharlann Teanga agus Foclóireachta ar líne atá á forbairt ag Foras na Gaeilge mar thionscadal comhthreomhar le tionscadal an Fhoclóra Nua Béarla-Gaeilge. Is é cuspóir an tsuímh ná rochtain shaor agus réidh a thabhairt do lucht úsáidte na teanga ar shonraí foclóireachta, gramadaí agus foghraíochta a bhaineann le focail sa Ghaeilge. Cuirfidh an suíomh ar chumas an úsáideora aon chuardach amháin a dhéanamh chun teacht ar na hiontrálacha foclóra, an t-eolas gramadaí agus na comhaid foghraíochta a bhaineann le haon fhocal ar leith.

Na seanfhoclóirí: EID agus FGB

Ar an suíomh seo tá leaganacha inchuardaithe leictreonacha de English-Irish Dictionary (de Bhaldraithe, 1959) agus de Foclóir Gaeilge-Béarla (Ó Dónaill, 1977), an dá fhoclóir atá mar phríomhfhoinsí tagartha ag pobal na teanga le breis is caoga bliain.

Tá na rannóga seo den suíomh bunaithe ar fhoclóirí clóite a cuireadh i riocht leictreonach. Mar chuid den phróiseas sin, rinneadh scanadh ar ábhar clóite, rinneadh próiseáil ríomhaireachta air, ansin rinneadh léamh profaí agus ceartúcháin air. Mar sin féin, d’fhéadfadh earráidí cló nó lipéadaithe a bheith fós sa téacs, agus má thagann tú ar a leithéid ba mhór againn dá gcuirfeá ar an eolas muid ina leith trí nóta ríomhphoist a chur chuig aiseolas2@forasnagaeilge.ie. Fáiltítear roimh aon aiseolas eile freisin.

Tugtar faoi deara gur fada anois ó foilsíodh English-Irish Dictionary (1959) agus Foclóir Gaeilge-Béarla (1977); más foclóir comhaimseartha atá uait, féach an Foclóir Nua Béarla-Gaeilge (2013 ar lean).

Bailiúcháin nua: gramadach agus foghraíocht

Ar an suíomh, leis, tá Bunachar Gramadaí ina dtugtar foirmeacha infhillte d'ainmfhocail, do bhriathra, d'aidiachtaí srl na Gaeilge agus Bunachar Foghraíochta ina bhfaightear comhaid fuaime sna trí mhórchanúint. Bailiúcháin nua iad seo a cruthaíodh mar chuid de thionscadal an Fhoclóra Nua Béarla-Gaeilge.

Amach anseo

Tá an suíomh á thógáil de réir a chéile agus mar chuid den fhorbairt leanúnach a dhéanfar air, beifear ag cur leis na feidhmeanna cuardaigh sa dá fhoclóir agus beifear ag cur go leanúnach leis an gcumhdach i dtaca le comhaid ghramadaí agus fuaime. Tá i gceist chomh maith go gcuirfí leagan in-íoslódáilte den bhunachar sonraí gramadaí ar fáil saor in aisce mar áis dóibh siúd ar spéis leo é.

Admhálacha

Ba mhaith le Foras na Gaeilge buíochas agus aitheantas a thabhairt do na páirtithe seachtracha a chabhraigh le tiomsú agus táirgeadh an tsuímh seo, go háirithe:

  • Kevin Scannell (Ollscoil Saint Louis) a chuidigh le cóiriú an leagain leictreonaigh de English-Irish Dictionary agus Foclóir Gaeilge-Béarla.

  • Pádraig Ó Maoilréanaigh (WinGléacht) a chuidigh le cóiriú Foclóir Gaeilge-Béarla agus a chuir sonraí ar fáil don Bhunachar Gramadaí.

  • Foireann Fiontar in Ollscoil Chathair Átha Cliath (focal.ie) a chuir sonraí gramadaí ar fáil.

  • Elaine Uí Dhonnchadha (Coláiste na Tríonóide) a chuidigh le cóiriú na sonraí gramadaí.

  • Macalla Teo, a sholáthair na comhaid fuaime.

  • Michal Boleslav Měchura, a thóg an suíomh.

Maidir leis an suíomh seo | Conas an suíomh seo a úsáid | Aiseolas | Inrochtaineacht | Breiseáin agus giuirléidí | Nuacht